PhoneHK 討論區 » 版主分享/交流區 » 給家長與學生哥的一席話

頁: [1]

lau_2162013-1-3 02:15 PM
給家長與學生哥的一席話

最近報章報道美國一個13歲學生哥收到父母送一部iPhone 作為聖誔禮物,聽見都覺得開心!不過呢部iPhone 仲隨機附送一份白紙黑字附帶條款,想用電話?得,只要乖乖跟住父母所訂明守則做就得。

睇返香港,其實早在十數年前就已經有父母給予小朋友手機,小弟都係其中一份子,當時學生哥部手機最主要目的係要同父母保持聯絡,因為佢地想知道小朋友返學有冇遲到,有冇準時上補習班游泳班,以及有事可以隨時同父母聯絡或者報警求助。隨著時代變遷,今日大家部手機已經由只包含語音通話功能,進化成多媒體多元化通訊工具。

正如頭先所講,手機係父母出於對自己小朋友關心而設,與此同時又擔心小朋友「唔識性」濫用電話!尤其今時今日智能手機當道,手機上網對大部份人講已經係必需服務,對一班醒目小朋友一樣唔例外。無論你去到酒樓,坐緊車,還是等睇醫生,都不難發現有部份小朋友手持iPhone、galaxy tab等等,自自然然智能手機同樣地會成為呢班小朋友生活一部份。眼見當下有中學生都拎住部四、五千蚊新款智能電話,亦有部份用緊只有打電話功能,幾百蚊有交易個種手機。其實家長們有冇諗過點解要畀一部最新款電話畀一個學生哥使用?電視廣告都有話養育一個小朋友要幾百萬,加上通脹等等因素,相信唔係個個家庭都能夠滿足小朋友手機方面可能好龐大支出。小弟以前身邊同學們有啲就曾經因為傾爆分鐘、send幾千個跨網短訊,出現巨額帳單而被父母cut電話;又聽聞過因為小朋友唔小心整跌電話落廁所、浴缸,或者跌爛電話而一年換幾次手機。甚至有位朋友最近閒談時同小弟講佢讀緊中一既妹妹試過亂用手機上網,出現四千幾蚊電話單,媽媽「買佢怕」出個幾百蚊無限上網畀佢用,而小弟呢位朋友日日朝八晚八,搵得雞碎咁多每個月先係交一百蚊電話費,仲要妹妹因為部電話又唔小心跌落水而上台買部最新note 2畀佢用。佢最後同小弟講左一句「唉!真係世界變,我地以前邊有咁兒戲!呀媽邊會對我咁好!」

各位家長:希望大家下次選購電話畀小朋友、或者幫小朋友辦理開台或續約時,諗深一層有冇必要買一部貴價高階手機,再加上一個幾百蚊無限上網月費畀佢呢?小弟唔係阻止你地咁做,只係想大家諗下如果一切得來得太容易,對小朋友本身會有乜野影響?對你小朋友身邊同輩又有乜影響?老實講一句,現今社會,小朋友們都係抱住「人有我有」心態,見鄰坐老友用緊iPhone,佢又有樣學樣要求父母買部。又或者見班長用手機上網上得好開心,自己就唔理「三七廿一」學人上埋一份!希望各位家長能夠適量地給予小朋友適當選擇,同時間要清楚講明你地提供乜野服務畀佢,可以點做唔可以點做,訂立適當條款等,此舉用以保障大家之餘,亦係要小朋友學習要自我控制,同時間要佢地知道一切得來不易呢個道理。

各位學生哥:爸爸媽媽努力工作,所有東西得來不易,如果你自知係一名「大頭蝦」,請你時刻緊記坐完車食完飯檢查有冇遺留手機,使用時候要小心,唔好跌爛或者跌入水。與此同時,唔好胡亂用手機上網、send跨網短訊等,雖然電話費唔使你自己處理,但係因為你一時之快,爸爸媽媽可能就要捱麵包過活!另一方面,大家唔好「一機在手」,課堂期間覺得課堂沉悶而用手機同隔離班同學sms傾心事,同班飯友傾下一陣去邊食飯;又或者放學唔想咁快返屋企唔想補習而拒聽父母電話等等。你地係應該以學業為重,如果你做過以上行為,就請你地盡快改過,唔好再濫用手機。

kamil2013-1-9 03:27 AM
學生$68上網plan夠用喇
其實好多電話係家長換新機
比左舊ge電話子女
手機價錢唔想講(我都準備出xperia z)
不過我出機係叫丫媽用信用卡比24個月免息分期
我每個月都要比返錢丫媽
我依加用gt540+iphone3gs
gt540掃下個mon都lag機
iphone3gs好多app都要收錢
先要出部新機

Jacky_Chua2013-1-22 09:30 AM
睇完呢篇文真係想share 出去
我覺得講得好啱
而家街上好多學生都會有一部手機, 仲要係最新款既 iPhone 5, Note 2
心諗, 一個中學生洗唔洗要咁部咁勁既電話? 你又唔係要做生意, 又唔係D咩經濟大偉業
但係人人都抱住 "人有我有" 既心態, 心入面覺得如果有部咁勁既電話就可以提升個人自信心, 即係 "型"
有D人會用蒞炫耀, 證明自己可以有部咁先進既手機

但其實, 呢部手機既背後係佢啊爸啊媽辛辛苦苦努力賺返蒞既錢而買到既

有人覺得伸手可及: "車, 我只要出句聲咋, 我啊爸啊媽即刻仆去買比我啦"
仲要唔識珍惜, 覺得手機款式冇咁新就會隨便換
完全唔會覺得可惜

kinkiwong642013-4-29 07:53 AM
如果我第日D仔女要用電話..我諗我只會比部打出打入+儲值卡比佢用就算.....
人仔細細唔駛用咁貴...
如果下下都出部貴野比佢地...佢地可能唔會識珍惜同覺得伸手可及...
要貴野讀好自己O既書先有資格問下有冇部好D手機比佢...
要佢知道得來不易...

sunnyko2013-5-7 04:01 AM
搭地鐵成日見到學生d手機下下都係最新款
仲勁過我地出嚟做野果d人.......

amie2013-5-28 07:08 PM
唔珍惜已經係呢一代年青人心態, 如果想下一代克苦耐勞d, 父母應該提供最舊/最平的手機/plan, 人要努力付出先珍惜, 足夠便可以, 唔好over

老張2013-6-20 03:26 PM
好贊成你的觀點,我都係十年前左右開始有第一部手機,係和記零機價上台的T190。然後雖然換機都算密(詳見簽名檔),但起碼我每買一部機之前都會做足101%的功課,了解清楚我下一部機到底比上一部有乜進步,值唔值得去換,同埋都會慢慢等跌價先入。依家係街上見到好多小朋友/初中生楂住4000-5000的手機真係有啲側目,而且好多都不是為手機本身而買,而是因為身邊的同學們買而買。作為學校和家長,我覺得有需要去壓抑呢種歪風,問題係,上樑不正下樑歪,在一個如此物質化、功利的香港社會中,大家耳濡目染見到的是全城到處都充滿洗腦式的廣告,再加上不少為人家長或者一些社會中的榜樣都似乎不介意任由這種思想傳輸(例如明星就經常係手機廣告代言人),又難怪小朋友只會不斷索求而不思考。


查看完整版本: 給家長與學生哥的一席話


Powered by Discuz! Archiver 4.1.0  © 2001-2006 Comsenz Inc.
Processed in 0.161128 second(s), 2 queries